【Viu】有林海峰就有歡樂！佢今早現身灣仔參加親子跑，搞笑話一到場見同齡嘅朋友仲多過小朋友，提議下次可以搞「耆英跑」，真係畀佢笑死！林公子又有冇同兩位寶貝女跑步？抑或會如林公子所講「一次『意外』足以致命」？跑步會係小朋友嘅童年陰影？
繼續延伸講親子活動，林公子抵死笑話林宅最佳親子活動係嗌霎，講到最難忘嘅活動就係揸車，莫非係全家一齊「焚」老婆彭羚嘅歌？林公子又暢談「牛仔」係佢嘅童年回憶，笑指睇漫畫嘅best timing就係屙poo poo嘅時候，所以特別有陣味道！早前佢飛「鄉下」日本跑東馬，跑跑吓筋膜炎發作又抽筋，最後靠咩完成賽事？
同場Natalie唐詩詠就笑話唔敢同周潤發一齊嚟跑：「佢嚟到仲得掂嘅？」又指未練跑前跑3K係好辛苦，依家就輕鬆好多！賽事場地鄰近麵包店，但Natalie話呢排都好少返，自爆返舖頭會被班同事嫌棄，邊個咁夠膽先？
提及有網民列三大罪炮轟麵包店，包括店員態度差、排隊人龍太長、麵包價錢太貴，Natalie大方逐一回應！佢又透露雖然未計總數，但有信心會比預期快回本！有傳佢變富貴進駐月租約12萬、2,000呎中半山豪宅，Natalie否認傳聞，澄清被影當日只係去朋友屋企食飯，幽默笑言鍾情山腳方便位！
嚟緊Natalie將首度挑戰演舞台劇，劇中佢飾演不孕女子，佢話為角色準備咗9個月嘅時間，目前最擔心體力頂唔順！另外，談及好友方力申升呢做人夫，Natalie指好戥對方開心，有冇準備禮物畀小方？期間Natalie見到林公子超hyper，最後成功搵偶像selfie？睇足本訪問就知啦！
