【Viu】Tyson Yoshi做咗人夫之後勁旺，今日佢又出嚟見大家啦！距離啟德騷尚餘9日，睇佢IG條片日操夜操，Tyson就話好滿意依家副body啦，胸肌幾多吋先？係咪人生最勁嘅size？佢又自爆之前操得太大隻畀軒公鬧，究竟係咩事？同時見佢叫fans操埋一份，唔通係有「目的」？
講到佢推出全新Remix版《跳樓機》，Tyson預告未必喺演唱會上唱，亦乘機先小人後君子話開騷從來都冇encore，所以到時冇就唔係代表佢寸！
Tyson又喺Threads以「表明立場免惹麻煩 冷傲退癲佬」出post，到底佢有冇「江門」、「肛門」飛？提起update完個台後發現仲有成行飛可以賣，Tyson利申唔係有心裝啲黃牛，但見到佢哋瀨晒嘢好high，真係好百厭呀！
軒公日前出活動得悉Tyson想生「馬仔」，就話會提醒巴打「做人」，Tyson笑指深信軒公做得出，仲大爆軒公朝早打過畀佢，莫非咁早就要「開波」？不過Tyson就婉拒飲海馬湯進補啦，事關佢話有信心一擊即中呀！之但係講緊係騷後先take action，Tyson笑話軒公教落，騷前禁慾會好氣啲！
除咗軒公自爆7月飛歐洲參加Tyson婚禮，呢日Tyson透露埋Serrini都會去，驚唔驚到時Serrini準備嘅靚衫華麗得濟會搶fo？林家謙又會唔會去？另外，Tyson表示都有慰問姜濤出意外一事，希望對方一切安好！
