【Viu】Tyson Yoshi呢一年喪做「空中飛人」，今日難得現身香港活動，咁就梗係要暢談最近發生嘅事啦！新鮮熱辣嘅當然就係佢喺台灣舉行簽唱會，幫兩位索爆女fans簽胸口，Tyson當下見到女fans揭起衫有冇嚇窒？佢沾沾笑話好彩細個練到一手毛筆字，功架了得唔會掂到！驚唔驚有fans之後會模仿？未婚妻Christy會唔會呷醋？使唔使肉償返畀Christy先？當初係林家謙先喺佢胸口簽名，Tyson秒稱係兩回事，笑指林家謙係變態！
新歌《1994》口碑同點擊極好，拍埋前傳《MK 1994》，但對黃秋生評價為「垃圾」，Tyson自己又點睇？秋生日前話可以趁試當真停運前合作拍片，乘機「破冰」？佢喺《MK 1994》咬嘴嗰part，係佢自己加落去？堅係走BL路線？遲吓秋生出歌又敢唔敢畀comment？點知Tyson推舉另一男子出口啦！再講返林家謙喺CHILL CLUB攞獎嗰陣，改咗佢句金句，Tyson直斥好悶：「佢唔肯將真實嘅自我釋放出嚟！」
婚禮舉行在即，有傳Tyson會喺意大利完婚，佢否認並指喺泰國，信不信就由你啦！早前佢做台媒訪問時話依家唔想生仔住，會靠睇A片宣洩，咁佢最近睇咗幾多套？另外，佢考中型貨車牌因由係咩？就係自製個私人空間睇A片？想知Tyson點答所有問題，就睇足本訪問啦！內容量MAX呀！
