【Viu】導演黃修平率領電影《看我今天怎麼說》一眾演員，游學修、鍾雪瑩、Marco吳祉昊，兩位小演員鄭進希、黃暐恆，仲有主題曲《What If》主唱陳蕾，齊齊現身慈善首映禮！
進希、暐恆孖住受訪喪放金句兼笑彈，講到電影早喺兩年前拍攝，進希抵死笑話領悟到人真係有成長，勁人細鬼大！佢哋又得戚話喺學校變咗風頭躉，唔少老師、女同學搵佢哋簽名、影相！
阿修曾透露得到「子信」呢個角色係受「小子信」進希帶挈，當事人進希又點鬼馬回應？佢又覺得同阿修似唔似樣先？當聽到暐恆自爆落沙灘拍攝整傷腳，點知進希再爆金句：「男人係要有傷疤！」真係笑死無命賠！進希指有睇專訪，知道阿修想簽佢，咁佢嘅意願又如何呢？
呢日再見返兩位小演員，阿修都話好開心，之後會同進希合作演父子？電影共獲7項金像獎提名，阿修、鍾雪、Marco指好戥團隊開心，係一個好大嘅鼓舞！阿修形容同許冠文、劉青雲、郭富城、林峯角逐「最佳男主角」係「五代同堂」，唔知佢今次有冇信心擺脫「亞修」封號，唔駛再爭一票只得亞軍？入圍新演員嘅Marco則話好開心、榮幸，對自己有個交代！
候選影后嘅鍾雪直言最興奮係有份填詞、陳蕾唱嘅主題曲《What If》入圍「最佳原創電影歌曲」，同樣感hyper嘅仲有黃修平，揚言努力爭取73位（連計陳蕾）上台演唱主題曲，至於講到佢入圍「最佳導演」，佢就謙稱攞唔攞到獎睇緣份啦！
另外，有網民爆料話見到阿修女友Jessica同Billy Choi現身機場，因而引起阿修被「戴綠帽」疑雲！呢日阿修澄清冇啲咁嘅事，解釋只係宣傳手法，知道女友同Billy Choi喺音樂上有合作同埋飛日本拍MV！惟講到Billy Choi嘅女友出story「恭喜」Billy Choi同Jessica，又將恩愛合照全delete，莫非呢個都係宣傳技倆？即刻去片聽阿修點講！
