【Now.com】正喺日本旅行嘅森美早兩日 (12日) 喺社交平台出post，話同太太從京都坐車去大阪，下午5點時被通知一星期前已付款訂好嘅酒店，未能提供房間入住，兩公婆要漏夜搵地方落腳，搵足一晚幾乎要瞓街，最後經朋友幫忙下，終於搵到酒店房入住，佢感激朋友幫手，否則可能要瞓街。
三因素齊出現致Over Booking
森美嘅經歷成為網上熱話，旅遊達人項明生喺社交平台發文分析事件，佢認為今次個案例子好罕見，指出遇上三個因素一同出現：「全球最受歡迎的旅遊國家，最熱門旅遊城市大阪，再加上日本公眾假期（連續三天體育節）。森美大哥太識揀時間地點，所以才會出現這種罕見情況，簡單嚟講就是Over Booking。」
項明生話，佢曾於疫情期間，喺台灣擔任連鎖酒店行銷總監一年：「我們並不願意接OT A的單，因為佣金頗為高昂，而且拖數拖很久。特別有啲OT A財政狀況不穩健。所以酒店永遠都想自己賣房，無論係經過會員制度，官網或者櫃檯或者住宿券。」
項明生指出，呢啲酒店房供應緊張時候，例如連續長假，特別係大阪入住率高達100%嘅旅遊城市，Overbooking就會發生。項明生：「估計他沒有pre paid，酒店沒有confirm 房間給OT A（通常pre paid才會過數）。但OT A系統已經自動出了confirmation給顧客，於是就出現了森美的慘慘豬情況啦！」
項明生向大家提供一啲旅遊小貼士，「作為用家，長假（包括香港以及旅遊地點）去旅遊城市（心目中應該知道全世界最受歡迎的三十大旅遊城市），經過OT A訂房後，或者直接上去酒店的官網訂房，更加穩陣。雖然可能會貴一些，因為OT A好多時有特價。」
項明生今早又喺商台節目分享幾個建議，喺中介網站預訂房間後，再寄電郵去酒店確認較穩陣，始終係咪畀旅客房間，決定權喺酒店身上，或者直接喺酒店官網預訂就最安全。
資料來源：Facebook@項明生 James Hong
