【viu】商台「903籃球賽」未開波就已經話題十足！DJ隊隊長森美今日現身活動受訪勁firm咁話有信心會贏，贏在經驗夠豐富，食「糖」比起歌星隊食米多，更稱習慣同小朋友打波添！火藥味持續濃厚！
聽見歌星隊隊長張繼聰笑佢成功將晨運同籃球加埋一齊，森美即反擊笑阿聰疏於練習，手臂唔夠佢勁，然後再燒埋歌星隊其他隊員嗰疊，話姜濤、Ian、Edan十足《男兒當入樽》入面嘅流川楓：「你有冇見過一隊全隊流川楓咁靚仔？」又突然發聲明指，其實阿聰係打完上屆後被踢走嘅，所以今年先返去歌星隊，竟然有啲咁嘅事？
而兩大隊長噚日喺電台節目首次交鋒，森美笑指阿聰得把口犀利，不過當佢聽到歌星隊有幾位都係青年軍，森美都當堂怯一怯，自覺體力可能唔夠後生砌，所以會加強練體能！暫時就諗咗兩招必勝之術，希望到時可以大派用場！問到囡囡到時會唔會嚟撐場？森美秒變慘樣話唔好提啲傷心事，莫非佢驚囡囡倒戈撐「女婿安」？「外父」森美又點睇「女婿安」追求林明禎？
同場仲有程人富@小薯茄，透露婚禮暫定最快明年底舉行，有向人夫岑珈其請教如何籌備婚禮唔嗌交！節目《潛在挑戰中》終於播咗挑戰食樹蟲item，富哥諗返都打晒冷震，懦夫mode揚言唔會再食蟲咁話！咁唔知早前《困獸鬥》去泰國拍嘢又有冇食蟲？一半人入醫院單嘢又有咩內幕？即刻睇足本訪問啦！
