【Viu】《商業電台六十五週年晚宴》今晚喺尖沙咀延開30席，勁熱鬧。森美、當奴吹雞903 DJ戴假髪現身，當奴就話抄胡歌，點知反效果。森美就以藍色假髮向郭富城致敬，仲即場扮城城招牌甫士。
當奴宣布今年佢負責籌備903籃球賽，仲笑話落場打要帶脷底丸。森美話上年姜濤受傷所以DJ隊鬆手輸1分，又爆張繼聰上年幫DJ隊戥腳後唔高興，私下用電單車轆佢隻腳喎！
森美今日剛好拎30年老人金牌，佢喺大學一年級做到而家，喺度識老婆，仲買第一層樓。佢又話嚟食飯前同老婆去咗打「友誼」羽毛球，笑C咩！
Do姐眨吓眼入咗商台13年，每日定時定候開咪，仲忙煲劇，連印度片都睇，真係可以寫劇評呀！講到老友黃子華同劉嘉玲12月演出舞台劇《香港式離婚》，佢沾沾話應該會有飛睇的，係愛呀！
