【Viu】韓星崔始源、劉嘉玲、吳君如同老公陳可辛，仲有周汶錡等今晚盛裝出席慈善晚宴，始源一出場已吸引大批Fans尖叫，Oppa亦好識做主動行近Fans簽名兼Selfie，而兩位「何家千金」超瓊同超盈都爭相「集郵」，可見始源魅力非凡！
不過，人生勝利組一定係君如，兩度同Oppa攬攬兼咬耳仔，就算老公傍住都興奮到面紅，君如仲自爆當年搵過始源拍戲，可惜因為檔期問題告吹，兩公婆都想同Oppa再合作。性感上陣嘅君如喺紅地氈上由影后變「影後」，喺Peter鼓勵下不斷華麗轉身，仲自爆好驚走光呀！
身為「姑媽」嘅君如，聽到Edan公開追求林明禎都抛窒，仲反問老公當年有冇公開追求自己，認真搞笑！
至於嘉玲姐就話同子華神嘅舞台劇加到58場好夠喉，雖然成身飛債，但希望唔好再加，擔心體力應付唔到。雖然為咗舞台劇準備閉關，但中秋節都會破戒喪食嚟應節！
