【Viu】第十七屆亞洲電影大獎頒獎典禮今晚喺西九戲曲中心舉行，出席藝人、頒獎嘉賓及候選電影人，於傍晚5時左右開始進入紅地毯，現場星光熠熠，包括張藝謀、是枝裕和、李英愛、梁朝偉、劉嘉玲、鈴木亮平、趙麗穎、許瑋甯、泰男神Win Metawin、蔡卓妍、黃梓樂、范冰冰、陳欣妍、林明禎、袁澧林、柯煒林、陳靜、吳家忻、梁洛施、陳湛文、關錦鵬、李駿碩、吳慷仁等等都有出席！
韓國「氧氣美女」李英愛登紅地毯，仙氣爆棚！對於獲頒「卓越亞洲電影人大獎」，佢指好榮幸，並多謝fans支持！更話想同梁朝偉集郵兼合作添！講到李英愛接演《大長今》續集，佢透露籌備中，想以最完美嘅狀態拍攝，希望續集令獲觀眾讚賞，再創傳奇！
梁朝偉同劉嘉玲襯到絕現身，憑《金手指》入圍「最佳男主角」嘅偉仔，坦言冇信心冧莊，大讚吳慷仁表現出色，自己亦係役所廣司Fans，但嘉玲姐就話老公係最好嘅！講到李英愛點名想同偉仔合作，佢就話好耐冇見對方，希望有機會合作。
kayan9896紅地毯受訪回應疑被《試當真》飛起一事，佢解釋《試當真》只follow常駐藝人，同樣3周年合照都係同一理由而冇份影，但kayan重申自己仍係其中一員，嚟緊開首個個人音樂會都有邀請《試當真》嘅成員嚟睇，並冇任何不和。
台灣男神劉冠廷同香港女神Angela袁澧林齊齊現身，劉冠廷首次來港參加頒獎典禮，感覺新鮮，好想同各位巨星集郵，仲自爆畀柯煒林教壞，亂講廣東話讚自己靚仔，笑Cry呀！而Angela就話拍台版《梨泰院Class》壓力好大，好彩台灣嘅拍攝時間相對輕鬆，仲話同對手周興哲合作愉快！
