【viu】Sammi鄭秀文事隔一年終登上紅館舞台，開足13場演唱會，噚晚（12日）頭場爆點非老公許志安上台合唱莫屬！西裝look打扮嘅安仔起初低調為老婆Sammi以鋼琴伴奏其歌《世紀末煙花》，未料唱到中段佢行出琴邊，全場fans一見到安仔現身起勢尖叫，場面超哄動！事關呢兩公婆莫講話合體，同台深情對唱更係激罕，同時佢哋亦係「安心事件」後首度同框，簡直係世紀畫面！
見Sammi同安仔雖然相隔十幾個人身位，但不時互相點頭微笑，似係向對方打氣！安仔更由神情緊張，之後變得愈唱愈放鬆，唱唱吓仲突然放粉紅色紙碎，增添浪漫氣氛！佢哋各自企原位面對面直到首歌唱完，都未有行近對方，安仔就連人帶琴降番落台，零對話、擁抱空間，但足以獲全場熱烈掌聲！而留喺台嘅Sammi就高舉右手、面帶微笑自轉一周感謝fans支持，然後就繼續獻唱！
而Sammi其實喺唱《世紀末煙花》前曾感觸表示：「睇到依家啲天氣反常，其實係幾擔心，呢幾年或者過得好艱難，但最緊要嘅係珍惜！」Sammi仲重提去年憑《流水落花》封金像獎后，講番起有幾咁多人戥佢開心、有幾多人支持佢，一時感觸落淚，場面感人！
去到個唱尾聲部分，Sammi代月前中風嘅經理人Wallace郭啟華報平安、帶嚟一個好消息，就係Wallace已經返咗屋企休息，仲復原得相當唔錯，進步神速咁話！另外，「百變天后」Sammi全晚不停喺台上quick change，配合38首歌變足13個look，可見Sammi為呢個騷花咗幾咁多嘅心思同誠意！
