【Viu】天后Sammi鄭秀文噚晚喺澳門展開8場《You & Mi鄭秀文澳門演唱會2025》嘅首場，四面台設計、加入好多全新巨型裝置，又配合全新服裝、新造型，Sammi同老公許志安合唱《世紀末煙花》嘅場面亦有帶到澳門觀眾面前，安仔同樣只係專心同Sammi合唱，未有喺台上講過一句說話。
演唱會甫開始，Sammi以黑色閃爆造型配長金髮、金色面具從天而降，型爆出場！唱克完《朝聖》、《發熱發亮》後，再換上另一條黑色長裙唱《我們的主題曲》同《親密關係》，Sammi就話：「又係一套新衫，完全係一個不惜工本嘅騷，換個新騷咁做，希望將香港最好睇、最精嘅部份搬嚟澳門之餘，亦都希望流程上可以做得更加精準、更加好睇。每次做騷，無論做到第幾場，我自己都好似新人咁企喺舞台，希望將最好嘅表演畀大家。」Sammi之後換咗紅色舞衣，同蔡浩然表演《唉聲歎氣》，二人擁抱又疑似咀嘴，又跳火辣椅子舞，睇到觀眾熱血沸騰！
Sammi同表演嘉賓胡定欣合唱《談情說愛》，Sammi分享：「大家會覺得好好奇，點解會請定欣做我演唱會嘉賓？佢又唔係歌手。就係因為我知道佢好鍾意唱歌，我哋每個禮拜喺同一個地方上堂，好有緣份，友情就係慢慢喺呢啲見面建立。」定欣表示非常多謝Sammi，又指Sammi有留意佢嘅演出、畀好多支持。Sammi仲同鍾舒漫、鍾舒祺兩姊妹與40位Dancers走勻全場，邊唱邊跳《表演時間》，氣氛相當好！
演唱會尾聲，觀眾熱烈要求encore，Sammi就化身「DJ Sammi」演唱《煞科》又打碟，仲大騷腹肌，勁吸睛！最後，Sammi唱出《我們都是這樣長大的》以及佢第一首國語歌《值得》，為澳門站演唱會第一場畫上完美句號。
