【Viu】Sammi鄭秀文嘅《You & Mi 鄭秀文世界巡迴演唱會2023（Rescheduled ）》噚晚嚟到第7場，邀得人氣女團COLLAR做嘉賓，一齊跳唱《煞科》；COLLAR仲誠邀Sammi喺旁邊睇佢哋重演勁舞同Rap部份，High爆全場！
Sammi話：「多謝COLLAR為今晚添上一股青春原動力！今次我請嘅嘉賓都比較特別，乜嘢範疇都有，有新晉嘅，亦有大家比較熟悉嘅。COLLAR，你哋覺得自己係新人定係咩呢？」Marf說：「永遠都係新人！」Sammi說：「講得啱喎，其實活到老真係學到老，我都要保持做新人嘅心態去學習，尤其喺呢個圈，不進則退，如果唔係我點可以依家仲開到演唱會呀？」
Sammi準備離場之際，COLLAR即刻叫停天后兼送大禮，原來係一個由好多包薯片砌成嘅大背囊，令「薯片文」笑到即刻孭上身兼大叫：「好正呀！」仲興奮到唱咗幾句《IQ博士》先離場，COLLAR隨即表演《idc》，表演獲觀眾激讚！完場後，Sammi孭住COLLAR送嘅薯片背囊跳住收工，仲話：「多謝COLLAR送畀我薯片背囊，我對呢份禮物非常滿意，仲開心過送鑽石畀我！」
Sammi演唱會向來有笑有淚，除咗同COLLAR炒熱氣氛外，噚晚同老公許志安合唱《世紀末煙花》時，阿Mi突然感觸到淚如雨下，安仔即時以微笑同點頭作回應。
此外，好友余安安、MakerVille行政總裁魯庭暉、Jeffrey魏浚笙、AGA江海迦、翁嘉穗、鄒凱光、Jace陳凱詠等專誠捧場。
