【Viu】Sammi鄭秀文澳門演唱會噚晚嚟到第7場，邀得Janice衛蘭任嘉賓，仲拖手合唱《親密關係》添！Janice先賣口乖讚前輩啲衫好靚，Sammi即風騷話：「我真係真係好靚嘛，人靚就著咩都靚！」Janice又多謝阿Mi多年前鼓勵自己做Gym減肥：「我好多謝你，就係Sammi團火好感染到大家！」Sammi仲鬼馬咁唱咗幾句：「我的熱情好像一把火！」當Janice問阿Mi係咪「I人」嗰陣，Sammi再放笑彈話：「我I㗎！in between啦，揈嚟揈去，M到就I㗎啦！」笑爆全場！
喺「眼淚系列」環節中，Sammi著上殿堂級時裝設計師Tomas Chan為佢度身訂造、意境淒美嘅「五臟六腑血管流淚裙」，仲話：「條裙有胸、有胃、呢個係子宮，好似仲有個腎。Tomas Chan嘅寓意係傷心到五臟六腑都識得流眼淚，呢條裙我特別鍾意！」
其後Sammi唱完《唯獨你是不可取替》後，老公許志安升上台以鋼琴彈奏《世紀末煙花》，Sammi話：「我想講，我好幸福，多謝你哋！」全場拍掌同歡呼聲，Sammi接住嗌咗一聲「安仔」後，安仔即甜笑點頭兼接住合唱，場面溫馨！
