【Viu】11場《Revisit張敬軒演唱會》噚晚喺會展開鑼，軒公化身「送禮軒」送大禮，又收到「澱粉」送嘅「大精籠」，有料呀！
雖然係Side Track演唱會，但舞台同服裝設計都睇到小編嘩嘩聲，軒公仲著咗7吋高踭鞋獻唱《迷失表參道》，向女士們致敬！
席間，軒公同澱粉盡訴心中情，多謝大家喺小鮮肉輩出嘅樂壇，依然選擇年紀唔細嘅自己，仲自爆從小恨做偶像男團，可惜天資有限，所以趁開騷盡地一煲，做盡各種起雞皮動作，隨即唱出同歌迷嘅定情歌《懷舊情人》，仲狂擺心心甫士，大癲呀！當佢跳唱完《無城有愛》後，仲自嘲係「中彈老年團」，笑Cry呀！
雖然軒公自爆畀歌手行家話佢狂Encore做壞規矩，但今次都有三度Encore，覆啅完甩嘴嘅《裝睡的情人》後，最後仲準備咗國際中文版嘅《First Love》同全場大合唱，創意十足！
