【Viu】最近忙住拍攝電影《超神經械劫案》嘅張敬軒，今日出席代言活動，雖然每日都要03、04開大早班，好辛苦，但同成班年輕人包括Jeffrey魏浚笙、Angus楊天宇同洪嘉豪等合作，氣氛好開心，加上可以見證老友王菀之畀人打，個心涼浸浸呀！咁Jeffrey有冇撩佢拗手瓜呢？軒公就話冇喇，可能對方知佢骨質疏鬆，但踢爆Jeffrey牙擦愛認叻，果然係「中二煨」！
講到因為拍電影而冇得去903個籃球賽，軒公都呻可惜，皆因自己特登跟前港隊朋友練波，諗住可以轉身射個3分波㗎嘛！不過，佢就唔認為商台淨係就MIRROR檔期，情況等如一大班人約食飯，唔得閒咪下次join囉！
