【Viu】張敬軒同游學修今日出活動分享創業心得，軒公直認首次創業係靠父母，但自己太感情用事，唔啱做老闆。講到歌迷會對內部認購年底個唱飛有微言，軒公解釋一切都要跟公司手續，自己都冇飛喺手，但確保歌迷會會員至少睇到一場，而且唔使捱黃牛飛，「寵粉軒」世一呀！軒公又話疫情唯一令佢舒服咗嘅位係，唔使幫親戚撲飛同包酒店食宿，自己可以專心做騷。
講到叱咤入圍「我最喜愛的男歌手」5強，再次以一敵四鏡，軒公笑言有平行時空Feel，感覺好似返咗2021年，仲話其實自己只係喺14年拎過一次，今年真心想再拎呀，各位澱粉識做啦！
此外，阿修早前同女友Jessica去咗卡塔爾睇世界盃，最感動係親眼見到美斯入波，仲專登拍片向女友解釋咩叫越位，so sweet！
