【Viu】唱作歌手林家謙今日「破處」出席商場活動，聖誕將至，佢笑話對節日又愛又恨，鍾意聖誕氣氛同時又有人群恐懼症怕太熱鬧，早幾年就有喺屋企報置聖誕樹慶祝，而一提起「樹」⋯不禁令人想起老友「樹妮妮」Serrini，家謙即抵死畫清界線：「我冇講佢呀！樹係不嬲都大棵⋯即係聖誕嗰啲！」
講到佢日前有去撐Serrini同Ivana個會展騷，喺後台仲被Serrini攬住影相，家謙又再一次「落閘」：「我支持王菀之囉！影相嗰個唔係我嚟！」繼而自爆喺活動前收到Serrini嘅「跟蹤」message，爆笑指對方一時喺上面紮營、一時喺附近做spa，總之就一臉恐懼大叫驚驚：「佢好似stalker咁，影咗相嚟睇話一望上去就見到佢，好驚！」問到之後會唔會再同Serrini有合作？家謙話尊重對方問吓意願先，但就堅拒寫歌畀Serrini：「佢都睇唔起我嘅作品！」
