【Viu】森美今日為兌換店NFT藝術畫廊做剪綵嘉賓，森美咁識搵錢，唔知佢又有冇玩下NFT咁呢？佢話：「當然有啦！不過我只係收藏，唔會買埋，因為我個人好穩陣，唔敢博，心臟會頂唔順。」咁是咪最有信心投資轉頭？森美即刻冧佢老婆，「我最大嘅投資係太太，我所有錢都俾晒佢，然後佢就投資喺仔女度。」講到老婆，森美話要彌補返對佢嘅愛：「以前後生我成日掛住做嘢，佢叫親我去旅行，我都話要做節目、要做騷，而家諗返呢啲時間一去就返唔到轉頭，所以依家我得閒都會陪佢，好似今朝先陪佢學騎馬，我就好明顯唔鍾意，因為我鍾意鐵馬㗎嘛！不過佢鍾意我就陪佢啦！」真係叻仔，老婆開心，自己就有好日子過啦！
咁廿四孝老竇又有冇幫囡囡撳Mirror飛呢？森美話：「冇啦！而我亦都唔敢問Edan，反而有問小儀，但佢話冇，不過我覺得佢係有的。吖唔係，依家應該要問阿正，其實我對佢都幾好，以新人嚟講我都唔係鬧佢好多，阿正好有前途㗎！你估佢會唔會俾飛我呢？」
