【Viu】Dee哥何啟華、Alton王智德、阿正、王雍泰（前名：龍志權）同BabyJohn蔡瀚億，今日為MakerVille原創劇《大誠實家》開鏡拜神 ，「無悔兄弟」Alton同Dee哥終於首度合作拍劇，可惜獨欠Lokman，不過佢哋唔覺可惜，相信將來大把機會，又笑言擔心觀眾睇完會嗌回水，皆因二人根本冇對手戲，咦，咁打耳㗎咩？講到MIRROR同ERROR都係大忙人，Alton笑認兩隊有「內鬥」，鬥瞓得最少，個人最癲紀錄係3日冇正式瞓覺；Dee哥就話由3月到依家都未休息過，辛苦晒！
Alton希望6月可以正式綵排紅館演唱會，但今次唔會騷肌，要「禪位」畀Jeremy，又講明唔畀ERROR做嘉賓，以免混亂。另外，Alton同Dee哥都有回應Frankie分手，希望大家畀空間佢處理。
至於處女下海拍劇嘅阿正，預告會有喊戲，但飲恨冇感情戲，如果畀佢揀的話，呢套劇最想咀BabyJohn，識嘢喎！佢又講明唔幫朋友訂MIRROR飛，希望Edan哥會留飛畀5膠；而王雍泰都搭單要一張飛，連女友都唔敢預呀！
