【Viu】「男B」陳湛文、周祉君同栢天男今日出席Viu Original 首部本地原創劇《Diane Be True呈獻：她和她的戀愛小動作》開鏡拜神，陳湛文演嚴謹嘅營養師，笑認身形瘦削夠說服力；周祉君演愛抛書包嘅電影人，似足現實嘅自己。講到前作《IT狗》叫好叫座，佢哋都想再添食，或者原班人馬合作，亦有短訊慰問失戀嘅Frankie。咁有冇順手問拎MIRROR演唱會飛呢？陳湛文大方認有，希望幫家人爭取到；周祉君就話今朝有上網㩒飛，笑言明明想睇MIRROR，但畫面淨係顯示ERROR，兩位又公開呼籲Lokman、Frankie同Stanley送上「名份」，畀佢哋入場！
此外，栢天男演日本人，男神咁出場，但笑言角色名唔係叫「根本英俊」，但為咗同年輕人合作而專登學潮語，仲識咩叫「佛系」添！
