【Viu】張敬軒噚晚舉行第7場嘅紅館補場騷，繼續落力獻唱冧fans之餘，亦繼續貼心提攜後輩，是晚請嚟Gareth T. 湯令山擔任嘉賓。軒公自爆同對方係喺網上結緣，被Gareth. T嘅才華深深吸引，因為有感喺近呢兩年愈嚟愈多新人將Hip Hop、R&B帶入廣東歌，感染到佢都大膽喺曲風上有新嘗試。
Gareth. T更特別點唱軒公歌迷會嘅主題曲《懷舊情人》，而喺之後嘅chit chat環節，佢帶嚟2本烹飪書送畀「遮遮」做禮物，幫手照顧軒公早、午、晚三餐，軒公收到份賀禮都唔知喊好定笑好，抵死笑話：「聽日有好日子過！」笑翻全場！Gareth. T亦把握賣廣告嘅機會，預告喺5.20出碟，軒公即刻開聲嗌support，成件事真係好有愛呀！
另外，軒公喺獻唱《笑忘書》前，指呢首歌係喺佢患情緒病嗰陣創作，重提當時情緒低落到曾一度有輕生念頭，好彩憑信念支撐過去。
