【MOBILE】雞煲&打邊爐，絕對係香港人嘅至愛，不過，A姐話次次食完麻辣，個嘴又麻，有時太油，又會痾，但邊個話雞煲就只係得麻辣雞煲架？嚟到大角咀食雞，除咗麻辣嘅川味雞煲，仲有養生正氣雞煲、秘製椰香雞煲、南薑雞煲同兒童適宜芝士雞煲，食完雞煲仲可以打埋邊爐，好滿足。
南薑雞煲
南薑雞煲選用新鮮黃薑、辣椒、原隻新鮮芝麻雞及唔同香料，雖然缺少咗麻辣雞煲麻嘅感覺，但黃薑嘅味道微辛微甜，一樣好有層次。
安格斯雪花肥牛
呢到嘅牛肉選擇有兩款，除咗牛小排，仲有我哋推介嘅安格斯雪花肥牛，安格斯雪花肥牛嘅油脂分佈平均，牛味香濃，值得encore。
西班牙黑毛豬梅肉
黑毛豬梅肉嘅豬香味濃厚，豬肉唔會死實，色澤鮮嫩，相當唔錯。
腐皮紙
少食到嘅腐皮紙呢到都有，輕輕灼熟就食得。
韓國珍寶蟹柳、激爽魚片頭
韓國珍寶蟹柳超長，索晒湯，正！而魚片頭大大件，超爽口彈牙。
而呢度仲有蔬菜櫃、飲品同甜品自取任食。
