【A&M Diary】大角咀有好多火鍋店、雞煲、放題、港式樣樣都有，而我同A姐今次就嚟到主打麻辣火鍋嘅成都老碼頭火鍋。雖然唔係任食，但價錢唔貴，質素仲要一啲都唔差，加上店內以宮廷為設計，真係好有旅行feel。
宮廷藥膳湯
湯底方面，呢到有唔少選擇，不過我哋都唔想食麻辣，怕太刺激，所以就叫咗宮廷藥膳鍋。湯底好足料，藥材味超濃，味道甘甜，未開始打邊爐前都忍唔住飲咗一碗。
舌尖上的牛舌
牛舌係呢度嘅招牌菜，薄切嘅牛舌經預先調味，輕輕燙5秒就食得，口感豐富，肉味又香濃，唔錯。
竹笙
大大碟，用嚟索湯，就最好味啦！
手工韭菜餃
打邊爐就最鍾意食餃，韭菜餃皮薄之餘，餡料十足，韭菜味好香濃，鍾意食韭菜就唔可以錯過。
珊瑚蚌
超新鮮，又彈牙，輕輕一勺就食得。
