【A&M Diary】如果你係灣仔嘅街坊，應該記得昔日嘅快樂餅店同順景茶餐廳就係隔籬鄰舍，一間主打招牌奶油筒等港式麵包，另一間則主打奶茶咖啡等茶餐廳美食。經過時代巨輪嘅流轉，快樂餅店同順景茶餐廳終於強勢回歸喇！嚟到銅鑼灣嘅快樂．順景，無論港式麵包定茶餐廳美食都有得食，今日嘅早餐就由快樂順景開始啦。
全日早餐
All Day Breakfast同Fish and Chips都係英國代表嘅美食，至於快樂．順景嘅全日早餐就將佢哋合二為一！大大塊嘅炸魚柳，即叫即炸，非常香脆，配埋秘製他他醬，就更加惹味。至於其他配料仲有黑松露蘑菇嫩滑炒蛋、法蘭克福腸、火腿同牛油粟米。而快樂．順景作為港式茶餐廳，當然要喺全日早餐加入港式元素啦，所以餐包就係非常酥軟嘅自家製菠蘿包，非常豐富。
港式早餐A
10間冰室茶餐廳，10間嘅早餐A都係火腿（仿鮑魚絲）通粉。當然快樂．順景都唔例外，早餐A係火腿仿鮑魚絲通粉配嫩滑炒蛋，味道係熟悉嘅味道，但平時早餐嘅牛油多士或餐包，嚟到快樂．順景同樣變成酥軟嘅自家製菠蘿包。
蛋撻
蛋撻分為兩大幫派，唔知有無人同我一樣都係鍾意牛油曲奇皮呢！牛油曲奇皮嘅牛油味香濃，撻皮鬆化，充滿蛋香，值得推介。
油占多
最後再加埋油占多，油占比例啱啱好，多士香脆。
凍檸茶
