【A&M Diary】以港式懷舊為裝修佈局嘅灣仔瀾之茶居，餐廳設計非常細緻，無論係花紋地磚、玻璃櫥窗都盡顯老香港情懷，就連牆上嘅海報、掛飾擺設都係店主嘅珍藏品，所以一踏進餐廳就好似回到花樣年華嘅世界。除咗一絲不苟嘅設計，店主對於食物出品同樣有份堅持，特登邀請名廚主理傳統點心同粵式小菜，務求為食客帶嚟高質體驗之外，原來背後仲有一個小故事。
瀾之茶居
早喺幾年前，店主希望以味道宣揚香港嘅地道特色，所以將港式點心嘅飲茶文化引進台灣。台灣分店以復古卡位配搭微黃燈光，呢種香港嘅懷舊文青風旋即喺台灣大受歡迎，所以老闆決定喺香港開設瀾之茶居，期望傳統文化同樣可以喺香港承傳落去。港版嘅瀾之茶居除咗設計花盡心思，餐廳仲特意聘請星級食府嘅前車氏粵菜軒之米芝蓮班底打理點心部分；更另外聘請前古天樂中菜廳嘅名廚主理粵菜部分，所以出品高質精緻。更期待年青一輩帶上長輩品嘗港式味道，再一齊回憶香港舊時。
正味古樹十五年普洱
講到飲茶，又點少得一杯靚茶呢？今日嚟到瀾之茶居就試吓正味古樹十五年普洱啦！普洱色澤褐紅，茶色透徹，味道香濃，非常順滑。
甘哥叉燒餐包
甘哥叉燒餐包絕對係瀾之茶居嘅代表作！叉燒包喺餐包皮上面加上脆脆嘅酥皮，口感充滿層次；至於叉燒用秘製醬汁整成，味道香濃。
松露蝦餃
瀾之茶居嘅所有點心都係即叫即蒸，所以夠晒新鮮熱辣。松露蝦餃皮薄餡靚，入口隨即散發出香濃嘅黑松露香味，更令鮮蝦嘅味道大大提升，重點係非常彈牙！
鵪鶉蛋燒賣
好耐無見嘅鵪鶉蛋燒賣，真係充滿回憶！鵪鶉蛋非常飽滿，至於燒賣嘅肉汁豐富，值得推介。
鮑魚糯米雞
鮑魚糯米雞嘅用料非常豐富，除咗雞肉、豬肉、蝦米、冬菇、瑤柱、蛋黃等之外，仲特別加入咗鮑魚呢！但咩配料對我嚟講都唔重要，最重要係糯米雞嘅荷葉味非常清香，再混合埋配料嘅香味，呢隻糯米雞嘅味道真係好有層次。
拔絲咕嚕肉
咕嚕肉炸得非常香脆，豬肉肥瘦均勻，所以有種入口即化嘅感覺。味道方面酸酸甜甜，非常醒胃！
松子鱸魚
絕對係考驗廚師嘅菜式之一，呢碟松子鱸魚絕對夠驚喜！新鮮嘅鱸魚預先起骨，再拎去炸，所以食起上嚟啖啖肉，外脆肉嫩，每啖魚肉都充滿酸酸甜甜嘅醬汁，轉眼間就輕鬆清碟。
大蝦粉絲煲
大蝦新鮮彈牙，但最正當然係索晒全煲精華嘅粉絲啦！粉絲充滿大蝦嘅鮮香味，非常惹味。
小炒王
小炒王配料有韭菜花、蝦、魷魚鬚、菜甫、腰果、炸芋頭絲、芹菜、韭黃、辣椒絲等，色彩夠晒繽紛。但靜靜雞話你知，食小炒王最重要係試到餐廳出品夠唔夠鑊氣，結果當然係鑊氣十足啦！
