【A&M Diary】繁重嘅工作後，當然要讓美味滿足一下疲憊嘅身軀啦！講到最治癒嘅方法，莫過於約埋成班朋友，叫幾碟熱辣辣又有鑊氣嘅小菜，再配上一杯冰凍大啤酒，慢慢食慢慢嘆吓！位於太子嘅美富菜館海鮮蒸氣火鍋，繁忙時間下廚房爐火全開，鑊氣伴隨住陣陣香味撲面而來，熱鬧氣氛令人不禁聯想到昔日大排檔最鼎盛嘅年代。
美富菜館：鹹菜豬肚花甲湯
天氣又熱又焗，甜中帶酸嘅鹹菜豬肚花甲湯就最適合醒一醒胃喇！美富菜館嘅鹹菜口感爽脆，鹹酸味唔會過濃；豬肚則口感爽滑，食落越𡁻越甘香。美富菜館特意加入花甲，用海鮮令湯底更鮮甜，味道更有層次。
美富菜館：枝竹火腩魽魚煲
講到代表佬味嘅小菜，首推枝竹火腩煲。火腩皮口感薄脆，醬汁融入豬皮後，鹹香更加突出；而美富菜館嘅枝竹火腩煲更配上肉多骨少嘅魽魚，鮮甜嫩滑魚肉伴隨住火腩嘅肉香，加上充分吸汁變得柔軟嘅枝竹，點可以唔叫多碗白飯呀！
