【A&M Diary】近年唔少人喜愛北上，令本地飲食業踏入寒冬，難得見到新開張嘅泰國菜登場，絕對要支持。位於灣仔嘅Bang Rak，餐廳裝潢雖然走平實風格，但味道卻非常驚艷，而且Bang Rak嘅出品非常正宗，絕對一試難忘，識你嘅味蕾迴旋於泰國風味之間。
Bang Rak：封門柳船麵
講到泰國菜，又點少得船麵呢！Bang Rak嘅船麵湯底由上枱一刻已聞到非常香濃，而以豬血為重心嘅湯底亦帶有絲絲微甜，並帶點微辣，極具層次，麵底掛湯一流。配料就揀咗封門柳，牛肉嫩滑，肉味香濃，兼且份量十足。值得關注嘅仲有醬料盒，加入喜愛嘅辣椒粉同魚露，令味道更勝一籌。
Bang Rak：海南雞飯+蝦餅
Bang Rak嘅泰式海南雞預先起骨，所以食嘅時候啖啖肉，點上泰式海南雞醬更添惹味，風味十足！至於滑溜嘅雞皮夠薄，唔會太油；而肉質嫩滑肉香，配埋油飯一齊食就最夾。跟餐嘅蝦餅，即叫即炸，外脆內軟，彈牙非常。
Bang Rak：烤豬頸肉
Bang Rak嘅烤豬頸肉烤到焦脆，迫出多餘嘅油脂兼有乾脆口感嘅外皮，非常驚喜。至於豬頸肉口感彈牙，搭上脆香嘅炸蒜，辛香嘅味道令豬頸肉更惹味。
Bang Rak：冬蔭公
講到最能夠代表泰國嘅傳統菜式，又點少得冬蔭公呢！Bang Rak嘅冬蔭公除咗酸酸辣辣嘅必然味道之外，因為加入咗鮮蝦，所以令湯底多添一份鮮甜味，味道充滿層次，非常醒胃。
