【A&M Diary】天后嘅食街出名多嘢食，應有盡有，琳瑯滿目。而喺食街屹立多年，主打泰國菜嘅泰出色泰國餐廳就係我哋嘅心水推介。餐廳內掛上泰王及王后嘅相片，可想而知餐廳由傳統嘅泰國人主理，出品充滿地道暹羅風。
泰式小食拼盤
今次我哋叫咗二人餐，套餐非常豐富抵食。除咗湯之外，前菜嘅泰式小食拼盤，就有2串泰式沙嗲串燒豬、泰式炸蝦餅同埋泰式炸春卷。兩款炸物都好香脆，特別喜歡泰式炸蝦餅，蝦肉份量勁多，食嘅時候夠晒彈牙。泰式沙嗲串燒豬有意想不到嘅肉嫩，加上微微嘅焦香，非常惹味。
泰式焗粉絲虎蝦煲
隻隻虎蝦都大大隻，肉質彈牙之餘，仲要爆多蝦膏。重點當然係墊底嘅粉絲，完美地吸收晒蝦膏嘅鮮甜味，加上蒜蓉嘅香味，又香又濃！另外，伴隨蝦煲嘅仲有泰國香蔥蒜蓉包，建議上枱先食，如果唔係，粉絲就會索晒啲醬汁呀！
無骨海南雞
啖啖肉嘅無骨海南雞，啱晒我哋呢啲懶人！金黃色嘅雞皮，望見就流晒口水。雖然呢啲無骨海南雞係雞胸肉，好彩雞肉尚算嫩滑，而且海南雞唔肥，唔會成個碟都係油，所以食嘅時候無咁大負擔。
菠蘿雞粒炒飯
唔知大家最中意泰式菠蘿炒飯邊一種配菜? 我就最中意提子乾喇！甜甜哋嘅提子乾，除咗令人更開胃之外，重點係增加整個炒飯嘅口感。至於飯粒炒到粒粒金黃色並且粒粒分明，乾身得嚟又充滿淡淡黃薑同咖喱味。
泰式珍多冰、泰式奶茶
除咗甜品之外，套餐仲有飲品。泰國嘢嘅特飲又點少得珍多冰同泰式奶茶呢！珍多冰嘅綠豆粉條、椰汁、椰糖同冰碎，椰香味極濃，鍾意椰汁必點；至於泰式奶茶奶，奶香十足，但又唔會蓋過茶味，比例啱啱好。
