【A&M Diary】大窩口作為一個住宅區，如果無朋友住喺呢頭，真係好少會涉足到呢個地方。但正正就係因為住宅區，所以區內其實有唔少街坊餐廳，大件夾抵食。嚟到悅知味中泰越風味融合菜，餐廳主打東南亞風味，讓味覺一次過輕鬆暢遊多個地方啦！
粉葛紅蘿蔔蠔豉鯪魚湯
除咗東南亞風味，餐廳亦有中式選擇，其中包括老火湯！特別係出街食嘢食得多，有時都會掛住屋企嘅老火湯。悅知味中泰越風味融合菜每日都會提供唔同款式嘅湯水，是日就有粉葛紅蘿蔔蠔豉鯪魚湯，粉葛生津解渴，清甜嘅紅蘿蔔配合蠔豉令湯頭嘅鮮甜味得以提升，飲完真係滋潤番曬！
沙嗲牛肉串燒、泰國雜錦小食拼盤
小食就揀咗泰國風味。沙嗲牛肉串燒嘅肉味相當豐富，加上醬汁，非常惹味；至於泰國雜錦小食拼盤就有常見嘅香脆嘅魚餅、蝦餅同春卷之外，仲有河豚乾呢！河豚乾香脆惹味，食落充滿魚味，送酒一流。
越南鮮蝦芒果米卷
另外，作為越南代表嘅越南鮮蝦芒果米卷亦無令人失望。香口嘅蝦乾配搭味道清新嘅青瓜絲同蘿蔔絲，令呢份春卷口感非常豐富。而作為主角嘅鮮蝦相當鮮甜彈牙，同酸甜嘅芒果好夾。點埋泰式甜酸汁，非常醒胃惹味。
