【A&M Diary】來都來了九龍城，我就搵開隆姐，講緊嘅當然係泰國大廚隆姐啦！九龍城作為香港嘅小泰國，有唔少正宗嘅泰國菜餐廳，其中開業超過20年嘅隆姐泰國美食館都算係區內嘅名店，而且食物選擇多，唔少食材同調味料由泰國空運到港，味道充滿泰式風情，成為我哋其中一間嘅泰國菜食堂。
沙嗲串燒
隆姐泰國美食館嘅沙嗲串燒有多款肉類蛋白質選擇，全部即叫即烤，我哋叫咗串燒雞肉同豬肉，兩款都有淡淡嘅焦香味，大火燒烤令肉汁豐富，配上濃厚花生味嘅沙嗲汁就更惹味啦！
醃海鮮沙律
醃海鮮沙律以鮮魷、青口同蝦做主角，全部都非常新鮮，其中鮮魷同蝦都非常彈牙。至於酸酸辣辣嘅泰式沙律汁，加上生菜同木耳，口感同層次都做到。
肉碎生菜包
豬肉碎配上切碎嘅紫洋蔥同辣椒，令辣味相當刺激，絕對係經典嘅泰國菜！
泰式辣椒膏炒蜆
好有鑊氣啊！隻隻炒蜆都大大隻，漲卜卜，沾滿泰式辣椒膏醬汁，更加惹味！
