【A&M Diary】M佬：香港邊到食泰國菜最正？
A姐：梗係九龍城啦！
M佬：跟得我多，真係醒咗喎！
九龍城一向都係好多正嘢食，尤其係泰國菜！今日我哋就去試下門口有個吹氣公仔郁嚟郁去嘅小曼谷海鮮燒烤屋！
牛油蒜蓉燒蟶子
蟶子鮮甜多汁，特別欣賞濃郁嘅牛油味，加埋蒜蓉同白飯魚仔，味道豐富！
原隻鮮魷魚筒釀糯米飯
大大隻鮮魷魚筒原隻上碟，賣相吸引，鮮魷魚新鮮彈牙，鮮味十足；裏面仲釀滿糯米飯，煙靭癡牙，吸晒魷魚嘅鮮味，好特別！
明爐香檸汁蒸桂花魚
平時多數係烏頭，呢到有貴價啲嘅桂花魚，肉質嫩滑，加埋香檸汁同辣椒，酸同辣味配合得啱啱好，非常惹味！
芒果粒粒沙冰
天氣咁熱，最啱飲沙冰，冰塊打到好似綿花咁滑，芒果味香濃，仲有粒粒芒果肉，透心涼！
泰式龍眼冰
食泰國嘢必飲龍眼冰，清甜嘅龍眼味，十分解渴，仲有好多龍眼肉，好滿足。
