【A&M Diary】有齊漬物、茶碗蒸、麵豉湯同主食嘅午餐定食，竟然只係HK$58！但定價咁平，食物質素會唔會將貨就價？位於大圍嘅木子居酒屋，餐廳貫徹名稱，以木為設計主題，加上樓底又夠高，設有日系傳統餐桌，設計落足心機呢！至於食物出品都夠高質，絕對係抗通漲嘅抵食之選。
角切魚生丼
碗仔細細，飯底雖然唔多，但魚生份量十足。角切嘅三文魚、赤身、八爪魚、劍魚之外，仲有一大隻赤蝦。所有魚生都非常新鮮，夠晒鮮甜，特別喜歡劍魚個份油鮨感！至於飯底同樣細心，用上赤酢飯，抵食又好味！
咖喱炸雞定食
除咗魚生飯之外，仲有熟食選擇。即叫即炸嘅炸雞，炸到脆卜卜，而肉質仲非常juicy呢！日式咖喱夠香濃但又唔會太辣，非常惹味。至於每份定食都有齊漬物、茶碗蒸、麵豉湯同主食，其中茶碗蒸夠晒滑，蛋味香濃，好好味呢！
