【A&M Diary】想食地道美食，當然要深入民間啦！嚟到一向夠「地」嘅長沙灣，街坊美食多不勝數，而除咗港式小食，就連上海滬菜都有，食盡大江南北！位於長沙灣嘅萍萍上海館，係一間家庭式小店，食物出品雖然欠缺精緻華麗嘅外表，但就多咗一份人情味同自家製作嘅心意！
招牌上湯小籠包
一籠四隻，每粒小籠包都充滿濃郁嘅湯汁，非常鮮甜。雖然小籠包嘅皮唔算太薄，但家庭式嘅自家製作，食嘅係一份堅持！
紅油抄手
鍾意食小海菜就係喜歡有好多小食選擇！抄手有五隻，醬汁香香麻麻，小辣得嚟唔會嗆鼻，另外帶有黑醋同蒜蓉香，夠晒惹味。
蔥油拌海蜇
除咗熱葷嘅小食，冷盤小食選擇都唔少。海蜇爽脆，散髮濃郁香味嘅蔥油，非常醒胃。
水晶餚肉
製作非常費時嘅水晶餚肉，估唔到喺萍萍上海館都搵到！將豬腳起骨後以花椒、八角、蔥段、薑片、紹酒等醃製。攤凍後，餚肉嘅皮色晶瑩，鹵凍透明，呈一層豬皮，一層蹄肉，又香又滑，充滿骨膠原。
