【A&M Diary】講到充滿老香港嘅情懷，當然會諗起港島西區一帶。每次去上環，就好似坐咗時光機，返到昔日嘅香港。由舊香港嘅唐樓建築、聞到海味嘅鹹鮮香氣、聽到熙來攘往嘅電車叮叮聲，仲可以喺上環嘅美味苑食到接近失傳嘅港式傳統風味，一嚐聽過老人家講去過嘅「真」糯米雞。
正宗糯米雞
平時認識嘅糯米雞，都係由荷葉包住，但美味苑嘅糯米雞，還原失傳嘅港式傳統，用成隻雞包住糯米飯。所以糯米飯吸收晒雞嘅精華，至於，食嘅時候先用鉸剪剪開雞皮，食到雞皮嘅香脆，同糯米飯嘅軟綿口感，口感充滿層次，而糯米飯嘅味道濃郁，絕對係美味苑嘅招牌菜！
蝦醬炸蒜雞
講到傳統港式嘅醬料，有點少得蝦醬呢？鹹香嘅蝦醬味道充滿漁村風味，用上薄薄嘅炸漿包裹住嘅雞肉，食落香脆可口，勝在味道唔會太鹹，惹味非常。
燒汁鱔球
每日採購嘅新鮮鱔魚，製作成鱔球嘅魚肉肉質彈牙，而燒過嘅外皮香脆，配上味道帶甜嘅燒汁，口感同味道都非常滿意。
海鮮小炒王
美味苑嘅海鮮小炒王用料豐富，魷魚、蝦、銀魚仔、花生、豆角同芋條等材料，夠晒鑊氣，而且鮮味十足，而且巧妙用上唔同顏色，令到呢碟海鮮小炒王嘅賣相色彩豐富，而味道充滿鹹香，色香味俱全。
