【A&M Diary】冰室、茶餐廳、大排檔絕對係最能夠代表香港嘅地道飲食文化！雖然昔日嘅冬菇亭大排檔唔少都已經搬咗去熟食市場，但仍充斥住香港人嘅人情味，充滿本土情懷。嚟到其中一個仍保留住香港老情懐嘅地區：上環，特登去咗棟記飯店食飯，感受一吓大排檔氛圍。
棟記小炒王
食大排檔又點少得小炒王呢！棟記小炒王超多配料，淨係海鮮都有鮮蝦、蝦乾、魷魚同帶子，再加上韭黃、洋蔥、彩椒、腰果等等嘅配料，加上xo醬一齊爆香佢，鹹香道十足，加上少少辣味，勁有鑊氣，最啱當然係配返罐啤酒啦！
炸子雞半隻
半隻炸子雞加上彩色嘅蝦片，攞盤好靚。而炸到金黃色嘅炸子雞，外脆內嫩，完美地鎖住入面嘅雞汁。
馳名鹽焗烏頭
廚師上菜前仲特登揭起咗魚皮，食嘅時候夠晒方便。雖然烹調方法只係用咗最原始嘅鹽焗方式，但食嘅時候完全感覺唔到烏頭嘅泥味，反而鹽香帶出咗烏頭嘅鮮味，真係好好味呀！
