【A&M Diary】街市熟食中心一向係平民嘅美食尋寶地，叫幾個鑊氣小炒，嘆杯啤酒，大家盡情暢談，真係最地道，最貼地嘅美味！嚟到港島西嘅西環，呢度保留咗老香港嘅舊情懷，而喺西環石塘咀嘅勝記小廚，就搵到香港大排檔嗰種古早味，食物出品唔會令你失望。
麻辣豬手
前菜就叫個麻辣豬手醒醒胃啦！豬手皮好爽脆，一啲都唔肥膩，充滿骨膠原！至於麻辣味夠晒入味，少麻少辣，怕辣嘅都食到，絕對係開胃小食首選。
啫啫豬潤雞煲
啫啫豬潤雞煲絕對能夠體驗到大排檔嘅鑊氣！上枱嘅渣渣聲，夠晒熱辣辣，加上洋蔥同其他配菜，香氣十足。至於雞件非常滑，掛上醬汁，非常惹味。至於豬潤無內臟嘅腥味，非常新鮮，口感爽口彈牙。
芥末牛柳粒
牛柳粒切得大大粒，每一粒都沾滿特色芥末醬，少少辛口感，再配上焦糖合桃，非常清新，出奇地配合。
勝記小炒王
食大排檔點可以唔叫小炒王呢！韭菜花配上菜脯、大蝦乾、鮮魷同沙角，炒得非常有鑊氣，再加上炸白飯魚同腰果，增加口感，惹味十足。
