【A&M Diary】以前搭長途台鐵，總會買份便當，喺㗎火車度欣賞風景，然後會有一個台灣靚仔行埋嚟同我打招呼，問我目的地去邊……發完白日夢喇，原來坐我隔離嘅唔係台灣靚仔，只係M佬；火車嘅風景亦只係太古城誠品嘅畫面；但好彩仍然有份百芳池上便當，滿足了。
皮蛋豆腐
豆腐香滑，醬汁濃郁，仲有Q彈皮蛋，絕對係最佳配搭。
香酥炸雞腿便當
雞髀即叫即炸，雞髀成隻手掌咁大，炸到金黃鬆脆，雞肉嫩滑夠Juicy。店員細心地將飯同雞髀分開上，令雞髀嘅油分唔會流晒落個飯度，飯面仲要鋪滿炒粉絲、菜甫、栗米粒、椰菜、 紅蘿蔔絲同滷水蛋，分量十足，亦令食飯嘅時候多咗口感。
香酥豬扒肉燥乾拌麵
豬扒醃得入味，炸粉唔厚，成塊豬扒夠大塊又無骨，最愛就係啖啖肉。拌麵上有好好肉燥，有肥有瘦，比例啱啱好。
