星期日約咗A姐同佢屋企人食早餐再去行嘉頓山，明明較好鬧鐘，點知起身已經12點！！！好彩佢屋企人體諒我近排返工忙，但係A姐就勁嬲，鬧爆話12點仲邊度有早餐食喎！唔通佢唔知有60幾年歷史，近期大翻新嘅深水埗雪山冰廳，逢假日早餐食到下午2點鐘？一於食飽飽再去行山啦。
港口味沙爹牛肉公仔麵+香蔥碎牛肉炒蛋三文治
A姐叫咗傳統嘅沙嗲牛肉麵，沙爹醬比一般濃味，牛肉索晒沙嗲味，味道濃郁，麵底煮得啱啱好，唔會太硬或太腍。早餐另外配塔香蔥碎牛肉炒蛋三文治，蛋夠滑，香蔥配上碎牛嘅味道異常突出，再加上脆卜卜嘅烘底，真係perfect！
蕃茄濃湯鮮牛肉通粉+櫻花蝦炒蛋配鮮奶多士
A媽就叫咗蕃茄濃湯鮮牛肉通粉，湯色夠紅，飲啖湯就更加知用咗好多蕃茄肴湯，好開胃，而牛肉份量唔少。早餐另外配塔櫻花蝦炒蛋配鮮奶多士，蛋汁爆多，相當嫩滑！而櫻花蝦令到成個炒蛋嘅味道更有層次！帶有牛奶香嘅厚多士烘得酥脆，相當好味。
始祖椒鹽豬扒飯
A爸就話呢啲時間都係要有粒米落肚先得，呢個椒鹽豬扒飯上枱嘅椒鹽味好香噴噴。豬扒外層香脆，加上椒鹽，真係好惹味。更驚喜反而係炒底上嘅飯。飯炒得夠，仲有蛋絲、蔥粒，甜椒、炸蒜，成個炒飯真係不容忽視。
芝士焗波士頓龍蝦海鮮飯
而我就叫咗新推出嘅芝士焗波士頓龍蝦海鮮飯，喺雪山冰廳，用親民價就食到半隻多膏嘅波士頓龍蝦！海鮮飯仲有青口、帶子、魚同菇等，份量夠多，芝味香濃！將汁同炒底嘅蛋炒飯撈勻，呢個飯真係好好味。
樽仔招牌奶茶
樽仔奶茶雖然無得揀少甜、茶走、多奶、少冰……但呢個茶同奶嘅比例啱啱好，茶味突出，夠滑又唔會太甜，真係原汁原味。
