【Viu】電影《飯戲攻心》眾主演黃子華、張繼聰、Stephy鄧麗欣、林明禎、陳湛文同導演陳詠燊，今日齊集巴士廠為聽日請廣大市民搭巴士活動造勢，同場仲有6架印有佢哋大頭嘅廣告巴士晒冷！子華神仲保證會喺巴士站等大家上車！
佢哋除咗許下票房破7500萬嘅願望之外，子華神揚言要做史上謝票多過上映場次嘅電影！佢仲即場宣布新戲《毒舌大狀》會係明年賀歲片，到時兩套一齊互謝！問到《毒》會唔會有票房壓力？子華神坦言有，但自覺今年行運有希望！講到佢找數自彈自唱，原來佢只係練咗半個鐘咋！
阿聰就笑話今日缺席嘅Ivana王菀之，應該飛咗去陽光與海灘嘅地方影寫真相找數，咁就要等Ivana開估啦！仲未找數嘅仲有林明禎，佢笑話默默練緊Ivana首《狠愛狠愛你》，大呻好高音，Stephy搞笑話會給予精神上支持，又預告聽日或者會上巴士快閃謝票，咁多位fans要留意啦！
