【Viu】 ViuTV新劇《打天下2》噚日舉行開鏡拜神儀式，歐錦棠透露新一季有更多動作戲份：「AK打得最多！談善言打得最甘！」AK仲會有多場騷肌場口，棠哥甚至落order叫AK着勁tight嘅褲添！又對大讚首次合作嘅Tiger係有驚喜嘅演員，大騷深厚武術根底。而要應付9級高難度動作嘅談善言更被形容為「被演戲耽誤嘅武術家」。
早前被傳跟前DJ麻利拍拖嘅AK澄清：「絕對單身！」Tiger即神助攻問AK「M」字紋身嘅意思，AK大方答話係：「M for爸爸。」隨後又講到離開TG Group一事，原來係效法「蜘蛛俠」Tom Holland離開social media一排清空思緒，專注準備劇集同其他工作，相信「生粉」們會明白佢嘅用意。提起《全民造星V》12月開始面試，原定會同隊長Lokman去加拿大嘅AK話要等公司最後confirm。
