【A&M Diary】唔少人放假都鍾意租架單車，沿單車徑享受一個適合自己步伐嘅慢活假期。香港嘅單車徑同單車公園大部份集中喺新界同九龍，喺單車徑同單車公園附近更提供單車租借服務，等你隨時隨地「兩手揈揈」就可以享受踩單車嘅樂趣。我哋就特意盤點港九新界十一大單車徑同提供租單車嘅地方，今個weekend一於嚟一轉踩單車嘅文青小旅行啦！
鰂魚涌公園單車徑 Quarry Bay Park
港島嘅單車公園選擇唔多，其中鰂魚涌公園就係全個港島東最大嘅單車公園。公園內設有一條640米長嘅單車徑，單車徑以直路為主，相對適合單車初哥同小朋友。不過，園內就未有提供單車租借服務，大家要自備單車喇！
西九海濱長廊 West Kowloon Waterfront Promenade
西九海濱長廊有香港鬧市中罕見嘅單車徑，呢度綠化地方非常多，而且最大賣點就係廣闊嘅維港景色，好多人放假都鍾意嚟呢度野餐架！至於西九海濱長廊嘅單車徑全長1.8公里，提供單車租借服務，最大賣點就係沿住維港西海岸踩單車同時欣賞日落迷人景致。
西九龍租單車服務：Biciline
地址：香港九龍尖沙咀柯士甸道西與雅翔道交界
服務時間：星期二至五 14:00 – 19:00；星期六、日及公眾假期 10:00 – 19:00
蒲崗村道單車公園 Po Kong Village Road Park
位於鑽石山嘅蒲崗村道公園，呢度最大賣點就係有一條環迴高架單車徑，單車徑全長1公里。但要特別留意，公園單車徑只限兩個轆單車同需要佩戴單車安全頭盔。另外，公園亦設有平坦嘅單車園地，相對適合單車初學者。
鑽石山租單車服務：單車租賃亭
地址：九龍鑽石山蒲崗村道140號
服務時間：星期一至星期五 10:00 – 19:00；星期六、日和公眾假期 10:00 – 20:00
賈炳達道公園 Carpenter Road Park
賈炳達道公園位於九龍寨城公園旁邊，公園內設有圓形廣場及一條長約1公里嘅單車徑。單車徑有上斜、落斜、轉彎位，大大增加緊張刺激感。加上單車徑設路牌指示，讓大家踩得更安心。
九龍城租單車服務：單車亭
地址：九龍城賈炳達道
九龍灣公園 Kowloon Bay Park
九龍灣公園單車徑最大賣點就係8字型嘅高架單車橋，而此橋只供單車使用，行人唔可以步行。另外，仲設有一個專為8歲以下小朋友而設嘅單車練習區同初學者小斜坡。
九龍灣租單車服務：單車亭
地址：九龍九龍灣啟禮道
青衣東北公園 Tsing Yi Northeast Park
青衣東北公園鄰近青衣長安邨，並連接青衣海濱公園，沿住海濱踏單車，絕對係週末打卡好去處。另外，公園亦設有一條兒童單車徑，讓初學者練習技術。
青衣租單車服務：單車亭
地址：青衣担桿山路10號
將軍澳海濱長廊 Tseung Kwan O Waterfront Park
將軍澳海濱長廊單車徑由西面之調景嶺，往東至日出康城，全長大約2公里。途中會經過香港單車隊訓練場地嘅香港單車館公園。不過單車館公園內嘅設施只為運動員而設，其他人唔可以喺度踩單車。
將軍澳租單車服務：富康單車
店鋪提供買賣單車、配件及維修服務，當然更會提供租單車服務。
地址：新界將軍澳景林邨景林街市61A號
大水坑單車公園 Bicycle Park
位於馬鞍山大水坑嘅單車公園，主要為初學者熟習單車技術。如果你嘅單車技術自問唔錯，可以沿馬鞍山海濱公園往烏溪沙或白石方向前進，全程3.2公里。盡頭為烏溪沙公眾碼頭，可以吹吓海風，再作回程。
馬鞍山租單車服務：鴻運單車行
店內除了提供出租單車服務之外，亦可代訂各款單車，包括公路單車、爬山車及代步用車等。
地址：馬鞍山大水坑單車公園5號舖
沙田至大埔單車徑 Tolo Harbour Park
全香港最熱門嘅踩單車路線當然係大埔啦！好多人都會由沙田城門河出發，經過科學園、吐露港往大埔海濱公園或大尾督。全程約22公里，喺一望無際嘅吐露港海邊騎行，伴隨涼風，非常舒服。
大埔租單車服務：世運單車行
店鋪經營單車租賃多年，單車種類包括：小童車、輔助輪單車、爬山車、公路車、家庭車等都有。單車店整體子單車都較新，安全性及質素相對高。
地址：大埔富雅花園商場3&9B地下
大圍租單車服務：Freshabike
大圍的freshabike提供少數可供通宵租單車服務，更有單車存倉服務、出售、清洗或維修單車。
地址：大圍村第一街14A地下
沙田租單車服務：添好運單車
添好運單車店提供多個還車地點，大家可於沙田、大圍、馬鞍山、大埔或大尾督交車，十分方便。
地址：沙田源禾路1號
