【A&M Diary】香港有263座島嶼，但有人住嘅島嶼確實唔多，而香港最南又有人居住嘅島嶼就係蒲台島，所以蒲台島被稱為「香港南極」。大家除咗可以喺蒲台島行山郊遊、露營睇日出之外，嚟到蒲台島仲可以喺海邊食海鮮成嘆番碗紫菜餐蛋麵，臨走仲可以買埋手信。一於bookmark呢篇蒲台島食買玩十大推介，weekend嚟個蒲台島一天遊啦！
前往蒲台島方法
於香港仔或赤柱卜公碼頭坐船去蒲台島，由於班次唔多，所以記住預早少少時間去碼頭等船。如果航班已滿，就要等下一班船。但如果你連尾班船都上唔到嘅話，就要自己call隻艇仔離開或滯留島上1至2日喇！
提提你
1. 蒲台島設有一個旱廁，沿路亦設有多個流動廁所，但環境麻麻，有需要先會去。
2. 近蒲台島碼頭設有士多及餐廳，可以購買補給品，但都建議大家預備足夠嘅飲用水前往。
3. 我哋今次嘅行程採「山」字型走回頭路方法，屬於初級路線，如果選擇不走回頭路，梯級就會較多，大家記住要量力而為。
4. 大家記住保持環境清潔，自己垃圾自己帶走，絕對唔可以破壞大自然環境。
5. 郊外地區蚊蟲眾多，大家要做好防蚊措施。
6. 部份網絡供應商喺蒲台島未能提供網絡，所以大家除咗要轉飛行模式，仲要screen cap定渡輪時間表，以免錯過航班。
1. 蒲台島食買玩十大推介：蒲台島地道早餐
晨早流流起身出發，連早餐都未食，所以嚟到蒲台島嘅第一件事就梗係醫吓肚再行山啦！但嚟到蒲台島食咩好？識食嘅就梗係食紫菜啦！話說蒲台島又名蒲「苔」島，用呢個「苔」字，據說係因為島上出產海苔，所以嚟到蒲台島當然唔可以錯過名物：紫菜啦！其實蒲台島有多間士多，主要都係售賣紫菜腸蛋麵，而我哋就揀咗碼頭左邊嘅妹記士多。有人話妹記士多係蒲台島第一間賣紫菜腸蛋麵嘅舖頭，我哋就無刻意講究，選擇呢間士多主要因為婆婆嘅熱情同埋無敵海景呀！紫菜腸蛋麵嘅麵底係出前一丁，食之前要先將喺底嘅湯粉撈勻，由於湯底加入咗紫菜，所以鹹香十足，亦帶有點點嘅鮮甜，味道唔錯。而妹記士多除咗紫菜腸蛋麵，亦都有涼茶同海帶綠豆沙，所以行完山攰攰哋，都可以嚟到妹記士多嘆吓下午茶。
2. 蒲台島食買玩十大推介：蒲台石刻
蒲台島、螺洲、宋崗、橫瀾島同墨洲屬於蒲台群島之一，而蒲台島係呢五個島嶼中面積最大嘅島，面積為3.69平方公里。雖然蒲台島唔係香港最南嘅領土，但因為蒲台島係有人居住嘅最南島嶼，所以被稱為香港南極。其實蒲台島喺3000年前就有人類活動嘅痕跡，為咗親眼了解歷史，所以第二站我哋就喺到蒲台石刻。蒲台石刻係香港法定古蹟，石上面刻有3000年前嘅圖騰圖案，左邊嘅圖案似魚同動物，而右邊嘅圖案就由螺旋狀嘅條紋組成，唔知你又睇到啲咩呢？
3. 蒲台島食買玩十大推介：佛手岩
離開蒲台石刻，就會經過一條類似石澳情人橋嘅蒲台橋，背山面海，都吸引唔少人喺呢度打卡架！我哋分叉路繼續沿海邊行，就會經過佛手岩。佛手岩係蒲台島上最為人熟悉嘅岩石，絕對唔可以錯過。佛手岩因為風化而形成五隻手指，真係好壯觀架！
4. 蒲台島食買玩十大推介：126燈塔（南角咀燈塔）
離開佛手岩沿山路上山，就會去到126燈塔。126燈塔除咗係香港最南嘅燈塔，亦因為以白色為主色，所以充滿地中海嘅希臘風情。另外，燈塔面對住南海同太平洋，海天一色真係好靚架！此外，呢度亦係露營嘅熱點，除咗地勢平坦，呢度亦係香港最佳嘅日出觀賞點之一。
5. 蒲台島食買玩十大推介：靈龜上山石 / 僧人石
喺126燈塔打完卡之後，唔好咁快就行去另一個景點，因為呢度係最佳觀賞靈龜上山石嘅地方。影完相再沿路往靈龜上山石方向行，喺靈龜上山石嘅正對面就係僧人石，喺部份角度睇又真係幾似架！睇完靈龜上山石同僧人石之後，大家可以選擇不走回頭路，往觀日亭方向行，但我哋見到條長長樓梯，決定經蒲台橋拆返，相對行程會輕鬆好多。
6. 蒲台島食買玩十大推介：蒲台島海鮮午餐
蒲台島最高峰嘅時候超過二千人居住，以漁業為生。隨住漁業沒落，大部份原居民都搬到港島南區，依家得番大概二十位居民。靠山食山靠海食海，所以嚟到蒲台島就絕對唔可以錯過海鮮啦！呢間明記海鮮酒家靠近沙灘，真係好有芭堤雅嘅feel呀！餐廳提供唔到價位嘅套餐，豐儉由人。我哋除咗order套餐，另外仲叫咗幾款海鮮添，整體嚟講都算唔錯。
