【A&M Diary】鍾意行山打卡但又好怕行樓梯？如果你都有同感，我哋就推介位於屯門嘅菠蘿山（良田坳峽谷）。呢條菠蘿山大峽谷郊遊路線全程斜路，完全無樓梯，難得唔高之餘，重點係大峽谷嘅風景好靚，更有港版嘅美國大峽谷之稱，啱晒大家影相打卡呀！
前往方法
乘搭輕鐵至屯門良景站，經良景邨至良偉樓後面嘅山路上山
路線推介
由屯門良景邨嘅山路出發，大概1小時就會到達菠蘿山（良田坳峽谷）。玩完大峽谷可以沿路往返或繼續前進以下白泥為終點站。
提提你
1. 全程無任何洗手間同補給站，請帶備足夠嘅飲用水前往
2. 全程都以石屎車路為主，只有由菠蘿山（良田坳峽谷）去下白泥為小山徑，完全無樓梯，不過，一開始爬升坡福較大，大家記住量力而為
3. 大家記住保持環境清潔，自己垃圾自己帶走，絕對唔可以破壞大自然環境
4. 郊外地區蚊蟲眾多，大家要做好防蚊措施
5. 菠蘿山（良田坳峽谷）原屬軍事禁區，平日可能會有軍事演習，所以建議星期六、日前往
6. 全程都有唔少晨運客興建嘅休息地方，大家可以多多利用，稍作休息
菠蘿山
正確嚟講呢個大峽谷叫良田坳峽谷，亦被稱為「港版大峽谷」，而菠蘿山其實係指旁邊嘅另一座山。不過，大部份人都將良田坳峽谷誤稱為菠蘿山大峽谷。所以如果大家需要用google map搵定位，就要search「良田坳峽谷」呀！呢條菠蘿山大峽谷郊遊路線全程斜路，完全無樓梯係因為呢條路本身係用嚟做軍事演習，方便車輛進出。
入口起點
搭輕鐵去到良景邨後，去到良偉樓後面嘅山路就係上山嘅入口處。一開始起步就已經係大斜路，頭30-45分鐘都幾斜，好彩中途有唔少由晨運客搭建嘅休息地方，邊行邊休息，唔會話太攰太辛苦。
良田坳峽谷
完成頭45分鐘嘅大斜路之後，路段開始無咁斜，行得非常舒服。繼續沿住石屎車路前進，好快就會見到「此路危險 不得擅進」嘅路牌，而呢個路牌嘅後面就係良田坳峽谷。呢個峽谷經歷長年累月風化而成，深度都有20米，岩石嶙峋，非常壯觀！大家影相打卡嘅時候記住小心平衡，唔好失重心同去啲懸崖邊嘅地方。
