[芒草季必睇] 大東山行程／路線／交通／難道／景點之芒草打卡全攻略

【A&M Diary】秋高氣爽最適合就梗係郊遊啦，而每年嘅11月中至12月中都係香港嘅芒草旺季！香港雖然有唔少睇芒草嘅熱門地點，但講到名氣最大嘅就梗係位於大嶼山嘅大東山啦！大東山係香港第三大高峰，整段路程屬於中級難道，所以出發打卡前，大家記住做足準備，睇睇A姐M佬呢篇芒草打卡全攻略，就可以輕鬆登頂，享受郊遊行山嘅樂趣。

大東山芒草季必睇 – 介紹篇
大東山位於大嶼山，高869米，係香港第三高嘅山峰，僅次於957米嘅大帽山同934米嘅鳳凰山。其實869米即係幾高呢？就以位於中環，高412米嘅國際金融中心二期（IFC）為對比，大東山比兩座IFC仲要高，所以大家絕對唔好輕視大東山呀！不過，唔好咁快就俾佢嚇怕，繼續睇落去，我哋會介紹一條捷徑俾大家，等你哋行少啲，相對容易咁登頂。

大東山芒草季必睇 – 須知篇
1. 全程不設任何補給站，大家出發前記住預備所需物品
2. 記住保持環境清潔，自己垃圾自己帶走，絕對唔可以破壞大自然環境
3. 屬於中級路線，超多梯級，沿路上沿路落，大家記住量力而為
4. 攻頂前嘅一小段路並無梯級，上落非常跣，一定要戴行山手套、行山手杖同著行山鞋；如果諗住睇日出或日落嘅，山路全程無街燈，記住帶埋電筒呀
5. 不要踐踏芒草同採摘花草，愛護大自然
6. 大家真係要保持聲浪，我哋今次嘅行山過程中就有好多人開住大喇叭，其實大家嚟大自然都係想享受寧靜嘅環境，呢啲自私嘅行為真係好乞人憎架！！

大東山芒草季必睇 – 季節篇
大東山嘅英文名叫Sunset Peak，顧名思義大東山睇日落係非常出名架！仲有唔少人鍾意嚟大東山睇日出同雲海，但講到名氣最高就一定係每年11月中至12月中嘅大東山芒草季啦！大家想去大東山同芒草打卡，就記住bookmark定日期時間喇！

大東山芒草季必睇 – 難道篇
其實上大東山有3條路線，行山經驗相對豐富嘅人仕會選擇由黃龍坑道或南山上山，雖然路段唔算太斜，但由於爬升幅度高，時間較長，所以體力消耗較多，對於行山經驗唔多嘅朋友，就唔建議選擇呢兩條路線喇！建議大家可以搭巴士去到340.8米高嘅伯公坳起步，由起步點到山頂嘅高度就只有529米！雖然529米仍高於一座國際金融中心二期，但已經係一條相對容易登頂嘅捷徑呀！

大東山芒草季必睇 – 交通篇
如果同我哋一樣，選擇由伯公坳起步，只要喺東涌坐嶼巴11號或23號巴士喺伯公坳落車，上車前記住同司機講聲呀，因為會有分段收費優惠！

大東山芒草季必睇 – 路線篇
由伯公坳落車之後，就會見到行山路牌，一邊上鳳凰山，另一邊就係上大東山，記住唔好行錯呀！雖然話係捷徑，相對輕鬆，但其實又一啲都唔輕鬆，一起步嘅頭個半鐘，都係石級山路，不斷行樓梯，而且每級都非常高，行嘅時候會非常索氣，好多人或者都會同A姐一樣，萌生多次放棄念頭！但呢個就係行山嘅好玩之處，相信自己，挑戰自己，就會好有成功感喇！所以行山嘅同伴好重要，如果個個都係容易放棄嘅朋友，應該好難到達目的地。

喺呢個半鐘頭嘅石級山路，只有兩個木凳嘅休息點，除咗距離遠，仲會坐滿人，所以好多人都會沿路就地而坐，稍作休息。