【A&M Diary】南丫島有唔少外國人居住，所以一踏上南丫島就感覺到異國風情，好似去咗旅行咁，絕對係一個適合大家嚟休閒渡假嘅離島。南丫島係香港面積第四大嘅島嶼，設有多個碼頭往返市區，而今次我哋就由索罟灣出發，以榕樹灣為終點，為大家搜羅十二大南丫島食買玩嘅打卡熱點。
提提你
1. 南丫島家樂徑係香港其中一條合家歡，難度唔高嘅路線，全程都係石屎路，但大家都記住要量力而為。
2. 我哋選擇由索罟灣出發，係因為索罟灣嘅渡輪班次比較少，喺中環出發嘅時候，預算時間相對方便。如果以索罟灣為終點，可能就需要喺碼頭等一段比較長嘅時間（中環往返榕樹灣/索罟灣嘅渡輪班次）。
3. 喺索罟灣同榕樹灣都設有士多同洗手間，大家可以購買補給品，預備足夠嘅飲用水繼續上山。
4. 記住保持環境清潔，自己垃圾自己帶走，絕對唔可以破壞大自然環境。
12大南丫島食買玩打卡景點
1. 南丫島食買玩：索罟灣
嚟到索罟灣之後，呢度市中心嘅面積唔大，只有一條大街，成條大街主要都係餐廳同海鮮酒家。所以大家嚟到索罟灣，不妨先喺呢度食個海鮮午餐，醫飽個肚仔，再出發郊遊行山啦！另外，索罟灣亦設有南丫島漁民文化村，大家可以參觀魚排，一賞釣魚嘅樂趣。而喺南丫島文化村入邊仲展示咗三桅漁船、古董搖櫓舢舨同龍舟等漁民傳統文化。
2. 南丫島食買玩：菱角山
如果大家有足夠時間，體力有夠嘅話，係出發前往榕樹灣之前，可以順便行埋菱角山。菱角山有唔少打卡位，主要都係奇形怪狀嘅巨石，其中Poodle石同紡錘石更加係絕不可以錯過嘅景點！如果就啱芒草季節，仲可以同芒草打卡添！
3. 南丫島食買玩：南丫島家樂徑
南丫島最出名嘅行山郊遊徑，一定係連接榕樹灣同索罟灣嘅家樂徑啦！呢條家樂徑係1996年建成，上落波幅唔算好大，加上已鋪好石屎路，難度唔算高，適合一家大細，或者行山經驗唔多嘅朋友。
4. 南丫島食買玩：神風洞
由索罟灣嘅南丫島家樂徑起步之後，第一個景點就係神風洞。神風洞相傳係香港日治時期由日軍嘅神風敢死隊挖掘，喺當時有日軍嘅「特攻兵器」震洋艇部署駐防。呢個洞都有唔少鬼故事，所以我地只係喺門口路過就算喇！
5. 南丫島食買玩：南丫島觀景台
南丫島家樂徑係1996年建成，家樂徑設有多個涼亭觀景台，大家除咗可以稍作休息，亦可以從唔同角度俯瞰南丫島景色。
6. 南丫島食買玩：洪聖爺灣
喺榕樹灣同索罟灣中間，就有呢個洪聖爺灣，夏天嘅時候，有好多人鍾意嚟到呢度曬吓太陽同游水㗎！洪聖爺灣旁邊亦設有餐廳士多，大家可以喺海邊嘆吓下午茶，食碗離島出前一丁，飲吓汽水，吹吓海風都唔錯㗎！
7. 南丫島食買玩：南丫風采發電站
接近到達榕樹灣嘅時候，就有一條分叉路前往南丫風采發電站。呢條大斜路絕對係成個行程坡幅較大，相對辛苦嘅路線。但上到去見到呢個風采發電站，所有辛苦都係值得嘅！南丫風采發電站係香港第一個使用風力嘅發電站，亦係香港少見嘅再生能源設備，喺2006年2月23日正式啟用，估計全年可生產近100萬度電。而喺發電站嘅下邊，就設有風采發電站展覽中心，等大家可以認識一吓風力發電嘅資料。
8. 南丫島食買玩：大灣肚沙灘
大灣肚沙灘嘅沙粒唔幼滑，甚至有啲灰灰黑黑嘅感覺，咁點解仲要嚟大灣肚沙灘呢？因為大灣肚沙灘係最接近南丫島地標，3支煙通嘅位置！3支煙通其實係南丫島發電廠嘅一部份，由香港電燈營運，為香港島、鴨脷洲同南丫島居民提供電力嘅一個重要發電廠，並以天然氣為主要燃料。
9. 南丫島食買玩：建興阿婆豆腐花
行到熱辣辣，不如食碗豆腐花消消暑。進入榕樹灣市區之前，將會經過建興阿婆豆腐花。不過，呢間豆腐花嘅評語好壞參半，而我哋今日平日嚟到，鋪頭亦都無開，所以我哋未能夠試味再同大家分享。
