【A&M Diary】A姐M佬真係好鍾意食米線，喺我哋嘅米線地圖入面，就發現長沙灣就有唔少在地人推介嘅米線小店。今日就嚟到長沙灣嘅雲南風味過橋小鍋米綫，其實呢間餐廳一啲都唔起眼，甚至附近亦有唔少人氣嘅米線餐廳，不過，雲南風味過橋小鍋米綫亦有佢嘅賣點！
雲南過橋米線
正宗嘅雲南過橋米線係由食客自行將生嘅配料同米線放入滾湯，不過，呢度嘅雲南過橋米線雖然同樣地將配料、米線同湯分開上，但配料就已經一早整熟咗，叫做有種儀式感啦。呢碗過橋米線嘅味道唔錯，湯底鮮甜，而湯底先甜，米線分量十足，配料有齊火腿、生菜、雞肉、腩肉、豬潤、腐竹等等，絕對夠晒飽！
酸辣腩肉米線
呢度嘅酸辣湯底就酸多辣少，啱晒鍾意酸味重嘅朋友。不過，好似我呢啲鍾意食辣嘅人，枱面好彩有麻辣椒油，加少少落去，味道都唔錯。除咗酸菜之外，腩肉一層肥一層瘦，口感軟腍，份量唔少架。
