【A&M Diary】平時食火鍋放題，唔知你有無試過叫四碟牛，但結果只係嚟咗兩碟呢？漏單嘅情況可能常有發生，但嚟到相馬日式火鍋就唔駛怕，因為呢個極上牛肉拼盤挑戰套餐會一次過將1公斤嘅牛肉上枱俾你，如果兩個人喺一個鐘內成功挑戰，仲有半價優惠添！最鍾意打邊爐嘅我哋嚟到火炭分店，一於接受挑戰！
1公斤極上牛肉拼盤
我哋未食之前，以為店家只係搞吓噱頭，估計牛肉好肥，質素會好差，令你根本唔會挑戰成功。直頭上枱一刻，牛肉都有驚喜喎，呢個二人份嘅拼盤有500g美國進口牛肉、250g牛小排同250g牛肩胛。當中最好味就梗係牛肩胛啦！牛肩胛脂肪比例分佈平均，肥瘦適中，牛味濃郁；牛小排嘅肥瘦度適中，輕輕一淥就食得，肉質嫩滑；美國進口牛肉脂肪比例較多，但入口香滑，唔油膩。我哋2個人用咗大概45分鐘就挑戰成功喇！
火鍋配料自助吧
喺挑戰其間，你亦可以去到火鍋配料自助吧自取嘢食，選擇唔少，有丸類、菇類、蔬菜、烏冬同響鈴等等。我哋挑戰過程中就食咗唔少菜，以減低牛肉嘅油膩感，呢個策略估唔到又幾成功喎！
