【A&M Diary】一直以嚟，無論早餐定常餐，我都係食沙嗲牛肉麵，但自從加入咗Facebook嘅香港沙嗲牛肉麵關注組之後，就連午餐、下午茶同晚餐，都好想食沙嗲牛肉麵呀！喺關注組入邊，有唔少嘅沙嗲牛肉麵推介，當然沙嗲牛肉麵要撐，中環四季常餐都要撐！
滑蛋多士
先要讚一讚滑蛋同多士，滑蛋嘅蛋味好香，喺無加牛奶同忌廉嘅情況之下，炒蛋非常嫩滑；至於多士牛油味好香，烘得好鬆脆。
特濃沙嗲牛肉麵
身為主角嘅沙嗲牛肉麵，因為湯唔多，所以無將沙嗲汁溝淡，加上本身沙嗲味就好香濃，花生同沙嗲嘅比例啱啱好，食落好有層次。至於公仔麵軟硬度適中，係我最鍾意嘅黃金比例。唯一要批評嘅就係個牛肉，份量少得可憐。
