【A&M Diary】香港有好多特色嘅鄉村/圍村，大部份都分佈喺新界，估唔到原來香港島都有㗎！今日我哋自駕遊去到南區，探訪一吓呢條碩果僅存嘅薄扶林村啦！薄扶林村嘅寮屋色彩繽紛，而且依山而建，形成高高低低嘅村落，十足十韓國釜山嘅甘川洞文化村，啱晒影相打卡。但提提你，作為旅客嘅我哋記住要保持寧靜，唔好影響當地人嘅生活呀！
位置及交通
薄扶林村位於港島南區置富花園隔離，如果揸車嘅可以選擇泊喺置富花園（每半小時HK$10），而乘坐公共交通工具嘅可選擇途經置富花園嘅巴士/小巴。
歷史
薄扶林村係香港一個歷史悠久嘅鄉村，大約喺17世紀建成，而當時香港仍未開埠，所以有「未有香港，便先有薄扶林村」嘅講法。現今喺薄扶林村仍能發現原居民後裔嘅足蹤，所以更有歷史學家同文化遺產專家將薄扶林村視為香港島唯一嘅傳統鄉村。喺2013年10月9日，世界文物建築基金會公佈2014年監察名單，薄扶林村更成為唯一入選嘅中國文化遺產。
另外，薄扶林村舞火龍更加喺2017年獲列入《香港非物質文化遺產清單》，但薄扶林村現正受社會、政治、經濟變遷嘅威脅，面臨被清拆嘅命運。想去參觀嘅朋友，除咗要把握時間，更可以參加不定期舉辦嘅導賞團，從而更深入了解薄扶林村。
古蹟地圖
入村前，可參考村門前由村民製作嘅地圖，想遊玩各景點就更方便啦！
舞火龍
除咗大坑舞火龍，薄扶林村每年中秋都會舉辦舞火龍，至今都有百年歷史。依家雖然唔係舞火龍節日，但都可以睇到唔少龍頭嘅展品。
牛奶公司舊員工宿舍
1866年牛奶公司成立，喺薄扶林村附近興建咗一個牧場，當時由於招聘大量人手，所以起咗幾座舊員工宿舍，不過，依家已經荒廢，亦設置圍欄，所以大家只能外觀，從想像感受當年嘅繁盛。
龍池
位於龍池嘅瀑布經村民悉心佈置，擺放咗唔少檯檯凳凳，除咗聽到瀑布嘅流水聲，更可以俯瞰薄扶林村。
