【A&M Diary】有好多事情、人物或地點，喺度嘅時候覺得理所當然，唔識得去珍惜。當逐漸失去嘅時候，如果仍然唔去捉緊，喺未來只能夠成為回憶。如果回憶慢慢消失，當權者甚至會將歷史刪走，留低只係口耳相傳嘅一個傳說，最終銷聲匿跡！
曾幾何時，位於屯門嘅中山公園，每年嘅元旦日同中華民國國慶都會慶祝，喺紅樓前升上青天白日滿地紅旗並奏上國歌。唔知嚟到今日嘅中山公園又變成點呢？或者，將來有一日，中山公園銷聲匿跡，留低嘅記憶只係呢篇文章。
中山公園
相傳中山公園係孫中山當年同革命同志聚會嘅地方，由辛亥革命份子李紀堂所經營，讓興中會用作軍事訓練同儲存武器。革命份子就係呢度策劃惠州庚子起義同廣州黃花崗起義事件。
孫中山銅像及紀念碑
孫中山銅像旁邊掛上青天白日滿地紅旗，喺雙十國慶仲會播放中華民國國歌。呢度更加係全香港唯一喺露天懸掛中華民國國旗嘅地方。唔知過多幾年之後，仲可唔可以掛呢支旗呢？
青山紅樓
紅樓屬1920至1930年代嘅建築風格，為一級歷史建築。紅樓建築除咗盛載辛亥革命歷史，喺野史上仲有孫中山同妾侍陳粹芬感情。
